Tempo (Musik)

S Tempo (ital. „Zit“; Plural: Tempi /'tɛmpi/; von lat. tempus; dütsch au Zitmaass) git in dr Muusig aa, wie schnäll mä e Stück söll spiile. Vili Tempobezäichnige si gliichzitig au Usdrucksbezäichnige, wo Uskumft gääbe über dr beabsichtigti Charakter vom ene Muusigstück.

Dr daatsächligi Tempoiidruck vom ene Muusikstück isch aber e Fenomeen, wo witer goot as die räini Schlagzaal bro Zitäihäit und wo vo andere musikalische und nidmusikalische Parameter mitbestimmt wird, bsundrigs vo de Rhüthme, wo vorchömme, dr Dichdi vom musikalische Satz, aber au vo de Rüümligkäite und dr Daagesform vo de Musiker und vom Publikum.